Home » Parrocchia - Storia

Sants e Santis de nestre tiere

Mer 22 Dicembre 2010, scritto da Don Carlo
in
Jentrade
Chei brâfs artists che te glesie di Aquilee, tal imprin dal IV secul, cun tante fantasie, origjinalitât e sens artistic, a an fat il biel mosaic dal gjâl che al barufe cu la copasse, a vevin dal sigûr la idee che la vite e je dut un combati, un lotâ dal ben e de lûs cuintri dal mâl e de tristerie. Ancje la vite dai sants e des santis, che in ogni ete, a son sflorîts in tiere furlane, e je stade une lote cence padin cuintri dal mâl e de tristerie dai oms. Ducj chei che la an metude dute par vivi daûr di ce che al insegne il Vanzeli, a mertaressin di jessi metûts sui altârs. Ma dome cualchidun al à vude chê furtune. Lis notiziis sui sants dal Friûl di chest librut, a son tiradis fûr dal libri “Santi e Martiri nel Friuli e nella Venezia Giulia” e dal messâl propri de diocesi di Udin.
 
Sante Marie, Madone di Grazie
Marie di Nazaret no je une sorte di Diu femine, magari a front dal Diu om ebraic. Marie e je la prime des creaturis, sante, dute sante, santissime. Tancj a son i titui che e ven invocade: Imacolade, Dolorade, Sunte, Regjine, Intermediarie, Mari de Glesie, Madone di Gracie, ect... Tantis a son lis glesiis in Friûl dediadis a Madone di Gracie, scomençant di chê di Udin, in place Prin di Mai e che par antîc e jere dediade a sant Jervâs. Podopo in gracie dai Servs di Marie e fo dediade a la Beade Vergjine Marie di Gracie.
 
Sant Zuan Batiste, precursôr dal Signôr
Lui al è dal sigûr une imagjin di Gjesù di Nazaret. Dut di lui al fâs vignî iniment il Slvadôr, scomençant de conte de sô nassite che e va indenant compagn de storie de nassite di Crist. Ma e je plui di dut la date de sô fieste, ai 24 di jugn, tal moment dal plui grant sflandôr dal soreli, che nus fâs pensâ al Nadâl di Gjesù, ai 25 di dicembar, cuant che la lûs e torne a cjapâ fuarce e il soreli al resurìs. I rîts e lis fiestis preromanis che a celebravin il soreli, in dì di vuê, massime in montagne, I fasin fieste a sant Zuan. (24 di jugn)
 
Sant Jusef, custodi dal Redentôr
Lis pagjinis de Bibie nus al presentin tant che un om di pocjis peraulis, grant lavoradôr, pront a cjamâsi di responsabilitâts. Pront a tirâsi in bande cuant che nol covente plui. Par fâle curte 'un vêr furlan' (cussì a disevin une volte). Par chest al merete il so puest framieç dai sants furlans. (19 di març)
 
Sant Pieri, il prin dai apuestui
Si sa, l'apuestul Pieri nol è furlan e nol è mai stât in Friûl. Ma, pò stâi pal so naturâl di buine voie, gjenerôs, cjandit e superficiâl al è deventât une vore simpatic ai furlans. E cussì a son tantis lis storiis e lis contis che lu viodin lâ ator pal Friûl in cubie cun Gjesù di Nazaret (il Signôr). A Pieri i tocje simpri la part dal gnogno, dal furbat, e di meretâsi lis cridadis dal Signôr. A lui è je dediade la sede vescovîl di Zuji de Cjargne. (29 di jugn)
 
Sant Marc, evangjelist e pari de nestre fede
Te cripte de basiliche di Aquilee il grant afresc dal sofit, fat daûr dal stîl di Giotto, nus mostre Marc, dissepul di Pieri e autôr dal secont Vanzeli, che al dismonte de barcje e i fedêi aquileiês i dan acet. Al è ancje il cuadri di Marc che a Roma al presente Ermacure a Pieri che, cul rît de imposizion des mans, lu incarghe prin vescul di Aquilee. L'afresc de cripte al conte une 'liende' antighe. No si sa ben ce tant che al è propit 'vêr' de liende. L'ultin toc de sô vite Marc lu à passât in Alessandrie tal Egjit, tant che vescul. Di sigûr o savìn che tal Friûl la devozion a Sant Marc e jere vecjione e une vore slargjade. Di Aquilee la devozion a Mrc e je passade a Grau e po aVignesie dulà che Marc al è il protetôr. Di sigûr o savìn che e jerin tantis lis analogjiis liturgjichis e teologjichis tra la Glesie di Alessandrie e chê di Aquilee. (25 di avrîl)
 
Sants Ermacure e Furtunât, protetôrs de nestre Glesie
Ermacure tu lu cjatis tant che il pin te tabele dai vescui e dai martars di Aquilee; dutune cun lui al è il diacun Furtunât. La tradizion lu met dissepul di Marc, dal sigûr al è vivût prin de metât dal III secul. A Ermacure, e a Marie Sunte e je dediade la basiliche di Aquilee. Il so cult al è slargjât in dut l'alt Adriatic e di là des Alps, te zone di influence de Glesie metropolitane di Aquilee. I sants Ermacure e Furtunât a son protetôrs des arcidiocesis di Uin e di Gurize e de citât di Udin. (12 di lui)
 
Sants Ilari e Tazian, coragjôs martirs di Crist
Ilari si lu cjate al numer doi te tabele dai vescui aquileiês. Une tradizion antighe e dîs che al fo martirizât dutune cun Tazian ai 16 di març dal 284, sot dal imperadôr Numerian. A Aquilee e jere une gleseute tal puest dal so martiri. Pe pore dai Langobards, a la fin dal IV secul, i lôr cuarps a forin puartâts a Grau. I doi sants a àn vude une grande venerazion, massime a Gurize dulà che une glesie e jere dediade a lôr. La glesie, podopo ingrandide, e je deventade la catedrâl di Gurize. A son i protetôrs de citât di Gurize. (16 di Març)
 
Sants Felis e Furtunât, “furniment” de citât di Aquilee
Il patriarcje Cromazi intune predicje fate tor l'an 400, al ricuarde i doi martars tant che 'furniment' de citât di Aquilee. A sud di Aquilee e jere une basiliche a lôr dediade, tirade sù tra il IV e il V secul. Intune composizion dal VI secul Felis al è clamât vicentin e Furtunât aquileiês. (13 di agost)
 
Sants Canzi, Canzian e Canzianile, fradis ancje tal martiri
La tradizion e dîs che a jerin fradis. A forin martirizâts sot Dioclezian, tal imprin dal IV secul e sapulîts “ad aquas Gradatas”, tal puest che vuê si clame Sant Canzian dal Isunç Nol è tant che a àn cjatade la lôr basiliche e la lôr tombe cuntune vore di vues dentri. La devozion ai sants Canzians e je sigure za tal V secul. (30 di mai)
 
Sant Proto, mestri te fede
Documents epigrafics antîcs a sigurin che al fo martar e sapulît ancje lui a Sant Canzian dal Isunç. Il so cult al è dutune cun chel dai Canzians. La tradizion lu met lôr mestri e model. (15 di jugn)
 
Sant Crisogoni, “martar une vore beât”
Te tabele dai vescui al risulte vescul di Aquilee e martar sot Dioclezian. A Sant Canzian dal Isunç e fo cjatade la sô tombe cu la dediche “Al Martar une vore beât Crisogoni”. La sô venerazion e je slargjade par dut il mont cristian; a Ravene al è disegnât ta doi mosaics. (24 di novembar)
 
Sants martars di Aquilee, nestris modei di vite
Tune sole zornade, ai 5 di novembar, a vegnin ricuardâts ducj i martars di Aquilee, ancje chei che si sa pôc e che si confondin. Di cualchidun o cognossìn i nons, come sante Nastasie, sant Largi, sant Atanasi, sant Clement, lis santis Ciriache, Muscle, Tacle, Eufemie, Dorotee, ect...
 
Sants martirs di Concuardie “corone di eroisim”
I sghâfs fats che nol è tant a Concuardie Sagjitarie a rinfuarcin la tradizion dai martars de antighe Glesie di Concuardie Sagjitarie (PN). Un document une vore antîc al fâs i nons di Donât, Secondian, Romolo e di 72 lôr compagns. La lôr venerazion e je cressude dilunc i secui, ancje pai tancj miracui metûts sul lôr cont. (17 di fevrâr)
 
Sant Pio I°, aquileiês, sucesôr di Pieri
Daûr dai documents antîcs al jere di riunde aquileiese. Al guviernà la Glesie di Rome (sucessôr di sant Pieri) dal 140 al 154. I de sot par che la Pasche e vignìs celebrade simpri di domenie. Il so cult si lu cjate in Aquilee fin dai timps antîcs. (10 di lui)
 
Sant Valerian, salt difensôr de veretât cristiane
Al fo vescul di Aquilee dal 370 al 388; cun lui e scomençà la plui sflandarose stagjon de Glesie di Aquilee cul innomenât 'seminari di studis teologjics e di formazion spirituâl. Al riconfermà la fede dal concei di Nicee sul cont de divinitât di Crist cuintri dal Arianisim. Tal 381 in Aquilee al fo a cjâf dal Concei des Glesiis dal Ocident dulà che si condanà par simpri l'Arianisim. (27 di novembar)
 
Sant Eliodôr, prin vescul di Altin
Al fo disseplul dal vescul di Aquilee sant Valerian; al jere tal “ coro dai beâts” de Glesie Aquileiese. Al le daûr di sant Jaroni tal so prin viaç in orient e tornât al deventà prin vescul di Altin (PN). Sant Jaroni i dedià la traduzion di un pôcs dai libris de Bibie.
 
Sant Cromazi, “une vore studiât” pastôr dal so popul
Al fo sucessôr di Valerian te sede di vescul dal 388 al 408. Nus è rivât di lui un lunc coment al Vanzeli di Mateu e tantis predicjis. Al fo animadôr de vivarose congreghe di predis che si jere metude su in Aquilee. Sant Jaroni e sant Zuan Crisostomi nus garantissin il so grant impegn te pastorâl e te caritât. Dutune cul so popul al à vivût i moments dolorôs des invasions barbarichis. (2 dicembar)
 
Sant Nicete, vescul savi e bon
Dopo che Atile al veve sdrumade Aquilee tal 452 al judà in maniere valide a tornâ a tirâ su lis cjasis e a organizâ la Glesie. Dal pape Leon I al ve i conseis par meti a puest lis situazions intrigadis che si jerin formadis par colpe dai barbars. Al murì tal 485 lassant memorie di vescul savi e bon.
 
Sante Colombe, “vergjine consacrade a Diu”
A jerin tantis lis usancis e lis liendis che a Osôf a giravin sul cont di sante Colombe, cuant che dal 1717 il vescul Just Fontanin al discuviarzè te glesie di sante Colombe su la mont, il tombâl de sante. La epigrafe e dîs: “Chi e polse in pâs Colombe, vergjine consacrade a Diu, che e à vivût tal Signôr plui o mancul novante a gns. E fo sapulide te otave zornade des idis di agost sot dal consul Opilion, om di inomine, te seconde indizion”. La scrite nus dîs che Colombe e murì ai 6 di agost dal 524 e che e vivè tant che virgo consacrata, ven a stâi tant che vergjine consacrade al Signôr. Al è probabil vivint a cjase sô. Te prime domenie di lui, Osôf al fâs une fiestone in onôr de sô sante.
 
Beât Ratchis, iluminât duche dal Friûl
La tradizion popolâr a Cividât e met framieç dai beâts ancje Ratchis, duche di Cividât e re dai Langobarts, ancje se il so non nol è te tabele dai sants de Glesie Catoliche.
Ratchis, fi dal duche Pemon, di frut al à vivût a Cividât studiant te scuele de cort. Al jere par nature bon e puartât a conciliâ
Tal 737 il re Liutprant, parât fûr il duche Pemon, al metè Ratchis duche di Cividât. Tai siet agns che al fo in carghe, Cividât al deventà un centri di culture e di art. O vin l'altâr di Ratchis che o podìn amirâlu tal museu.
Tal 724, muart Liutprant, al deventà re dai Langobarts.
Tal 757 si ritirà tal monasteri di Montecassino par fâ vite monastiche.
 
Beât Pauli, arcidiacun e innomenât leterât
La tradizion popolâr di Cividât e met tra i beâts ancje Pauli Diacun, ancje se no si lu cjate tra i beâts del Glesie Catoliche.
Al nassè a Cividât tor il 730 di nobil famee langobarde, di frut al à vivût cui fîs dal duche. Al jentrà tal clericât e al deventà diacun de Glesie aquileiese.
Al fò storic e leterât langobart al timp dai rês Ratchis e Astolf. Colât il ream langobart tal 774 cu la disfate di Desideri, si ritirà a Montecassino.
Ma Carli il Grant al à volût vêlu te so cort tant che studiôs espert di storie.
Des sôs tantis oparis e je famose la Historia Longobardorum. A Cividât e je une cjase che si pense che e sedi la sô. (13 di avrîl)
 
Sant Paulin Patriarcje, mestri di sapienze e pastôr zelant
Di riunde e formazion cividalese, dopo de ocupazion dai Francs dal ducât langobart dal Friûl, al jentrà te scuele di palaç di Carli il Grant. Tal 787 al deventà patriarcje di Aquilee cu la sede a Cividât. Al fo impegnât tal inzornâ la Glesie e tal riformâ la liturgjie. Al fo autôr di une vore di imnis sacris e, par difindi la veretât de fede, al scrivè oparis impuartanti e al vè part tai conceis di Ratisbone e di Francfurt. Al inmaneà lis missions par evangelizâ i slâfs.
Al murì a Cividât tal 802. (11 di zenâr)
 
Sant Anselmo, duche dal Friûl e abât di Nonantule
Di gjarnazie langobarde, Anselmo al fo duche dal Friûl. Tal 749 bandonade la vite politiche, al fondà un convent e un ricovar pai pelegrins te valade dal Panàro. Daspò in graciis di une regalìe di so cugnât, il re Astolf, tor il 752, cui siei munics al tirà su la glesie e il monasteri di Nonantule (dongje Modene), metintlu sot de regule di sant Benedet e fasintlu deventâ un centri di no pôc di spiritualitât, di culture, di lavôr e di assistence sanitarie.
Anselmo al fo mediatôr di pâs te vuere fra Francs e Langobards.
Al murì ai 3 di març dal 803 e al fo sapulît te glesie dal monasteri. (13 di fevrâr)
 
Beade Benvignude Boiani, femine fuarte in ogni tribulazion
Benvignude Boiani e vivè a Cividât, dulà che e jere nassude dal 1255, e e jentrà di zovine tal ordin secolâr domenican. Tal so itinerari di esperience spirituâl, di contemplazion, e di solitudine e superà tentazions e provis di ogni fate. Vuaride di une grave malatie, e le su la tombe di sant Domeni a Bologne. E vivè in famee, vivint par so cont te umiltât fin che e murì ai 30 di otubar dal 1292. e fo sapulide te glesie di sant Domeni a Cividât. Il cult, di origjine popolâr, al fo fat bon tal 1765 di Clement XIII che le proclamà beade.
 
Beât Durì di Pordenon, apuestul dai Cinês
Durì, nassût tal 1265 a Vilegnove di Pordenon de famee Matiùs, al jentrà tal convent dai fraris minôrs di sant Francesc a Udin. Deventât predi a trente agns, dopo une piçule esperience eremitiche, si impegnà te vite monastiche, e si fasè cognossi pe austeritàt e pal impegn. Podop i fo permetût di consacrâsi a la predicazion missionarie, lant in Orient e meretantsi il sorenon di apuestul dai Cinês. Dal so lunc viaç pes Asiis, fat dal 1314 al 1330, fermantsi tre agns a Pechin, nus à lassât une bondante e curiose descrizion.
Al murì ai 14 di zenâr dal 1331 a Udin, dulà che il so cuarp al ven venerât intune arcje artistiche dal trecent, traspuartade de glesie di sant Francesc a la glesie dal Carmine. (14 di zenâr)
 
Beât Bertrant, patriarcje amì dai puars
Di riunde e formazion francese, dopo plui di une incarghe te Curie papâl di Avignon, tal 1334 al fo sielzût par guviernâ il patriarcjât di Aquilee. Al vivè te austeritât, impegnantsi te riforme morâl de sô Glesie, inmaneant sinodis e conceis, al implantà monasteris, al invià la culture; si fasè cognossi pe sô caritât cui puars.
Al reclamà i dirits de Glesie aquileiese, cjapantsi la ostilitât dai nobii dal puest, che a complotarin cuintri di lui e lu coparin dongje Sant Zorç de Richinvelde ai 6 di jugn dal 1350.
Al fo sapulît a Udin te catedrâl di cumò e daurman al fo venerât dai udinês.
Tal 1559 Clement VIII al autorizà la celebrazion dal aniversari de sô muart; Benedet XIV prime, Clement XIII dopo, a concederin la venerazion cul titul di beât pes diocesis di Gurize e di Udin. (6 di Jugn)
 
Beade Eline Valentinis, model di mari cristiane
Eline, nassude a Udin de famee dai Maniago tal 1396, e sposà Toni Cavalcanti e e deventà mari di sîs fruts. Restade vedue tal 1441, e deventà terziarie agostiniane e e continuà a vivi par cualchi an a cjase sô in Marcjât Vieri, madurint te preiere e te mortificazion une imitazion di Crist di esempli.
Reagjint cence rindisi a crisis di sconfuart e di strachetât, e deventà un esempli vivent di vite evangjeliche cul don dai miracui.
E murì dopo tantis tribulazions ai 23 di avrîl dal 1458. Il so cuarp, metût prime te glesie di sante Luzie, dulà che la beade daspès e leve a preâ, cumò al è tal domo di Udin. (23 di avrîl)
 
Beât Marc di Avian, predicjadôr fra i popui de Europe
Nassût a Davian tal 1631, a 17 agns al jentrà tal convent dai fraris minôrs capucins di Conejan e tal 1655 al deventà predi. Al à vût plui di une incarghe di responsabilitât tal ordin dai fraris capucins, ma la sô vocazion e jere chê di predicjâ al popul. Al deventà predicjiadôr famôs e al talpinà lis stradis dal Venit, de Slovenie e de Gjarmanie. Turbis di no crodi e corevin a scoltâlu. Tal 1683 lu cjatìn a Viene a fermâ la avanzade dai musulmans. Mandât dal pape Inocenç XI, al rivà adore di faur fâ un pat al re de Polonia Gjovani Sobieski e ai princips catolics. I turcs a forin parâts vie e ancje Budapest e fo liberade, dopo che par 145 agns la sô catedrâl di sant Scjefin e jere deventade une moschee. Al murì a Viene a 68 agns assistût dal imperadôr Poldo I e de sô femine. Al è sapulît te glesie dai fraris minôrs dongje des tombis imperiâls. (13 di agost) 
 
Sant Luîs Scrosoppi, vêr pari des “frutis bandonadis”
Luîs Scrosoppi, nassût a Udin ai 4 di agost dal 1804, fin di zovin al le daûr de vocazion di lâ predi che prin di lui a jerin lâts i siei fradis Carli e Tite. Deventât predi tal 1827, Luîs le metè dute par viodi de “Cjase des derelitis”, nassude pes frutis vuarfinis e bandonadis.
Tai moments di emergjence nol à vude pore a deventâ cercandul par dâur di ce vivi. Pes sôs colaboradoris al fondà tal 1845 une comunitât religjose, lis “Suoris de Providence”, che si son sparniçadis in Italie, te Americhe Latine, te Afriche e te Indie.
Dopo di une vite spindude pe caritât cristiane, pari Luîs al murì a Udin ai 3 di avrîl dal 1884. Cumò al polse te glesie dal Istitût des suoris de Providence a Udin in vie Scrosoppi. Il pape Zuan Pauli II lu à proclamât Beât ai 4 di otubar dal 1981, e Sant il 10 di jugn dal 2000. (5 di otubar)